Cindhe Laras
Nalika semana ana sawijining keraton kang aran Kediri ing Jawa Timur. Keraton mau dipimpin dening Raden Putra. Raden Putra iku sugih bandha lan nduweni kuwasa kang gedhe. Dheweke nduweni kasenengan adu pitik. Raden Putra kagungan garwa permaisuri lan selir. Ana salah sawijining selire Raden Putra sing nduweni niat elek arep nyingkirake permaisuri. Dheweke nudhuh permaisuri lan ngandhakake menawa permaisuri arep mateni sang Prabu kanthi ndeleh racun ing panganane. Sang Prabu banjur muntab lan mrintahake prajurite kanggo ngguwak lan mateni permaisuri ing wana.
Ing satengahing wana, para prajurit sing nggawa permaisuri mau ora tega arep ngrenggut nyawane permaisuri sing wicaksana lan nduwe budi pekerti kang luhur. Apa maneh sang permaisuri iku lagi ngandhet. Para prajurit banjur nggolek kidang lan nggawa mulih jantunge. Para prajurit mau kandha menawa jantung kidang mau jantunge sang permauisuri.
Pitung sasi candhake, permaisuri nglairake lan nduwe anak lanang sing dijenengake Cindhe Laras. Suwening suwe, Cindhe Laras dadi bocah sing pinter lan rosa. Dheweke seneng dolan ing satengahing wana. Sawijining dina, dheweke nemokake endhog pitik. Endhog mau banjur digawa mulih lan ditetesake. Endhog mau netes dadi pitik jago.
Kaya dene ramane, Cindhe Laras uga seneng adu pitik. Dheweke lunga menyang desa-desa kanggo ngedu pitik kang ditetesake mau. Jagone pancen rosa. Saben tarung mesthi menange. Cindhe Laras dadi dikenal dening warga-warga ing wilayah Keraton Kediri.
Kacaritakake sang Raden Putra uga krungu menawa ana jago sing ora bisa dikalahake sing diduweni dening bocah lanang sing isih cilik. Sang Prabu banjur ngundang Cinde Laras menyang keraton saperlu ngerti kaya ngapa ta jago sing dikandhakake dening para warga.
Nalika sang Prabu ngerti Cindhe Laras, dheweke kaget “bocah sing uripe ana alas kok tindak tanduke kaya dene putra bangsawan saka keraton”, pikire.
Raden Putra banjur ngajak Cindhe Laras kanggo adu pitik. Cindhe Laras nyaguhi, nanging kanthi syarat, yen dheweke sing menang setengah saka keraton Kediri dadi duweke Cindhe Laras. Sang Prabu saguh amarga dheweke yakin Cindhe Laras ora bakal menang.
Raden Prabu milih pitike sing paling apik lan paling kuat, nanging kalah karo pitike Cindhe Laras. Kabeh wong sing nonton padha kaget lan ora percaya. Jagone Cindhe Laras banjur kluruk :
“Kukuruuyuuuk...! Jagone Cindhe Laras… Omahe tengah alas… Anake Raden Putra!”
Pitike Cindhe Laras kluruk bola-bali. Sang Prabu kamitenggengen ora percaya. Dheweke banjur nyeluk CIndhe Laras nyedhak
“Sapa jenengmu ngger? Ngendi Omahmu?”
“Kula Cindhe Laras sinuhun. Kula urip kaliyan biyung kula ing tengah alas.”
“Sapa jenenge biyungmu?”
“Dewi Candra Kirana”
Sang Prabu kaget. Jebul Cindhe Laras anake. Anak saka permaisurine sing diguwak ana ing wana pirang-pirang taun kepungkur amarga dheweke percaya marang selir kang culas atine. Sang Prabu banjur nangis mingsek-mingsek amarga gela. Dheweke banjur mrintahake prajurit kanggo mboyong Dewi Candra Kirana bali menyang keraton.
Tidak ada komentar:
Posting Komentar